Allama Iqbal ka maktub Wasif Bakhshiyari ke naam Noor-e chashm Wasif Bakhshiyari Salma! Khuda salamat rakhe, bulaon se mahfuz rakhe Junushta jaan tum ne nooshta deewar kar diye, un par ahabab ke tabseer parh kar aankh bhar aayi. Kuch yun ke is deher-e naspaas aur koocha kamnigran mein itni chahtein, iltifaat, mohabbat aur kuch is se siva tabseeron ki zabaan, bayaan, mahaawra, nuktah shanasi, nuktah rasi, nuktah nawazi, bein al-sutoor ka tajziyah, arq-rezi ne mujhe tehreer ki lutf se ashna kiya. Mohabbaton aur inayat ne sharaboor kar diya. Sunta rehta hoon ke Urdu zawaal pazeer hai. Tumhare ahabab ne tabseeron mein jo fikri jolaniyan dikhlayi hain, ba'is-e-rishk hain. Urdu se un ki walhani mohabbat ki mehak, un ki zabaan aur intikhab alfaaz se ashkaar hai. Tum jaante ho ke main thehra zabaan ka phohar, hunar-e be-huneri mein yaktaaye rozgaar, ilmi nadar. Yeh mujh se kabhi na ho saka ke apne aap tamaancha maar ke munh lal kiye jaun aur kahun ke jo mere hae so raaja ke nahi. Kaise kaise sare araye saltanat sakhon guzre, un ke aqleem-e riyasat mein hazaron alfaz ki bastiyan. Woh to khair thay hi sakhon war, sakhon go, sakhon shaar, sakhon sanj, sakhon nawaz lekin un ke beroon-khana nokar chakar, chobdar, hajib, khidmat gar, faraash, shagird pesha, haqqa bardar, saqqah, aab pash, musahib, khadim, ghulam sab ke sab buzdla sanj, lehja shanas aur hifz-e maratib ashna. Daron khana ka tazkirah kyun karun ke begum sahiba ki begumati zabaan ka to poochna kya aur kehna kya. Woh to ittar mein basi, phoolon mein gandhi, pankhriyon jaise labon se ada hui, is zabaan ki khairat, zakat, sadqa bakhash jo ata hui to londiyon, baandiyon, kanizoon, mamaon, mughalaniyon, qalmaqaniyon, jasulaniyon, papush bardaron, malnon aur phalarnon bhi woh gul khilaye ke is zabaan ke aage sahra, budhi, gujra, sar pich, haar sab ne haar mani ke aakhir ko lab khandaan ki guftagu hai. Gulab lehja, nastaran aahang, suman kalam, shabnam fashani, dhunk rang, yeh to hui zabaan ki ek jhalak, lekin jis ne pas pardah halki si aahat ko suna, us par harf hazaar ma'ani ka ganjeena khula aur jis ne pas chalman aankhon ki zabaan suni, us ne khamosh takallum ke bhanwar mein musiqi ke sare raag sunay aur raginiyon ka sarapa aankhon aankhon mein simata. Yeh jamal, sama'at deeda aur basarat shanidah hai, jise aankhon se suna aur kaanon se dekha jaaye hai. Jo mastoor ho to roobaroo hai aur samne ho to parda posh hai. Firaq mein lutf-e wasl se sarsar kare hai aur wasl mein andesha hijr basmal kiya chahiye hai. Tumhein to khoob andaza hai ke taleem niswan Hindustan mein ek sadi ke aas paas ka waqia hai, warna to sari taleem tauba al-nusuh aur maraat al-arous par tamam thi. Yeh parda nashin khawateen kisi jami'ah ki farigh iltihsan nahi thi. Lughat se zabaan nahi seekhi jaati. Zabaan to ahl-e-zaban se seekhi jaati hai. Sare hi ahl-e-zaban ne in hi khawateen ke aaghosh mein parwarish pai hai. In hi se zabaan seekhi hai, kal bhi aur aaj bhi zabaan ka madaar wa qarar in hi gharanon par hai. Meer, Ghalib, Atish, Sauda, Nasikh, Inees, Dabeer, Josh, Firaq, Jigar, Yegana, Molvi Nazir Ahmed, Ratn Nath Sarshar, Muhammad Hussain Azad, kisi ne yeh nahi kaha ke yeh un ki apni zabaan hai balkay sab ne yehi kaha ke yeh un ke ghar ki zabaan hai. Tum to Urdu ke mudarris ho, khoob samajhte ho ke taroje aur taraqqi ki kya sooraten rahi hain. In tamam ke qata nazr itna to batlao dunya mein mardon aur khawateen ke liye alahida alahida peraye izhaar kon kon zubanon mein paya jata hai. Mumkin hai tum ko ya tumhare ahabab ko nisai tehzeeb aur nisai lab o lehja pasand na ho. Pasand o napasand ki baat aur hai lekin us ke wujood se inkar mahaal hai. Mujhe to ilm nahi hai kisi ne gehware mein lori baap se suni hui jo bachpan mein maan ke sine se lage rehne ki hararat barhape tak na bhool paya. Woh Urdu ko kya bhula payega. Meri talim ilmi ka tazkirah hai, hamare ustaad Molvi Fazlullah sahib Urdu ke muallim the. Meer, Momin, Ghalib, in ke pasandida shair the. Shayad hi kabhi aisa hogaaur ke unhone ek ghazal ek so'at mein parhai. pehle paanch saat minute to woh khula mein takte rahte, kabhi muskuratay, kabhi sanjeedgi ki parchaiyan chehre par liye sakht khade rahte, kabhi zeer lab apne aap se mukhatib rahte aur phir do teen shair parhte. parhte parhte kahin kho jaate aur waqt khatam ho jata. ek din Ghalib ki ghazal parhai rahe the: hawas ko hai nashat-e kaar kya kya nah ho marna to jeene ka maza kya koi do teen din baad maqta tak pohanchay to farmaya: "ab suno! yeh hai Ghalib!" yeh keh kar maqta parha: bulaaye jaan hai Ghalib, us ki har baat ibaarat kya, ishaarat kya, ada kya!! pehle misre ki to unhone do chaar minute mein tashreeh farma di. doosre misre par pohanchey to "ibaarat kya" kei zawiye se byaan kiya phir jab "ishaarat kya" par pohanchey, kei andaaz se byaan farmate rahe. har andaaz pehle se juda-gana, sabiq se alag. ek ajeeb samaan tha. kabhi lagta tha woh hum se mukhatib hain, kabhi mehsoos hota tha nah woh humare roobro hain, nah hum un ke samne hain. saara waqt pal bhar se zyada thehr nahin paata tha. ek saans lenay ke liye ruke, phir hum par nigaah karte huay deewar ki taraf dekh kar kaha: "ek phool ke mazmoon ko sau rang se baandho." humare class room se mutasal chaman tha, humne udhar dekha, lekin woh to deewar se mukhatib the, un ki nazar deewar se hatti to hum samne the. poocha "samjhe tum log?" hum kya kehte, hum chup rahe. ibaarat kya, ishaarat kya, khayal araai ya anjuman araai se fursat hui to badi tarah aur tareeq mein farmaya: "ada kya." us ke baad phir kho gaye. phir zeer lab do teen baar kaha: "ada kya." is doran kabhi halkay se muskuraye, kabhi aankhein band kar lein jaise aalam-e jazb mein hon, sab kuch to mujhe yaad nahin lekin itna yaad hai ke woh aahista aahista keh rahe the: kuch is ada se aaj woh pehlu nasheen rahe! jab tak hamare paas rahe, hum nahin rahe guzar ne ilaan rukhsat kiya, woh chonkay. science ke ustaad darwaze par the. baqol un ke "topi odhi" aur chalte chalte keh gaye: "yeh 'ada kya', jab waqt aaye ga tum khud samajh lo ge." is waqt meri umar chaudah baras thi, ab uthattar bahaar aur khizaan sar par se guzar chuke. aaj tak sochta hoon ke is talisma kade-e husn aur ishq mein is hazaar shiwa, hazaar rang o ma'ani lafz 'ada' ka mafhoom kahan se dhoond laaun? isay shab ki tanhaiyon mein dhoond aaya. namoodar-e sahar mein talash kiya. doobti shaam ke rangon aur siskiyon mein dekh aaya. ab aur kahan talash karo? tumhare baaz ahabab ne yeh khwahish ki hai ke tum mujh se khudnawisht sawaneh likhwaao. yeh koi aasaan kaam nahin. kehne ko do nafs ka ikhtisaar hai warna to dastan ek umar ki hai. koi pal sadiyon par bhari hai. kabhi ek muddat daraaz pal bhar se bhi kam hai. hazaar hazaar chehre dekhe. un par likhi dastanon ko warq warq parha. satr satr, lafz lafz, harf harf dekha. har lafz ne ek dastan byan ki. ek lafz aur doosre lafz ke darmiyan khamoshi ne zaat ke andar posheeda nahan khanon ki seer karaai. un ke nasb naamoon ke posheeda raaz aashkaar kiye. woh be chehra log bhi nazar se guzre jo naqab andar naqab chhupay chhupay se rahe. khud apna chehra zindagi mein nah dekh paaye. kabhi zaat ke aaine se roobro na huye. yeh to kuch josh hi ka haq tha ke zehr ke jaam nosh kar ke bhi jo kehna tha so keh gaye. log kehte hain josh ki yaadon ki baraat mein jhoot bhi shamil hai. mein jaanta hoon ke sach bas sach hai, nah barh sakta hai nah ghat sakta hai. aur jhoot ki inteha nahi hoti. lekin mujhe un ka jhoot acha lagta hai. josh ne apne haalaat zindagi hi ko sawaneh nahin samjha. yeh to josh ke andar ke aadmi ki bhi sawaneh hai. aarzooon ki, khwahishon ki, tamannaon ki, naadimeda hasraton ki, aatish shoq mein sulagte lamhon ki, raakh tale dabi hui changariyon ki. waise bhi kisi insaan ki apni koi sawaneh nahin hoti. us ke atraaf ke kirdar.Ro se mil kar sawaneh tarteeb paati hai. Zindagi tajurbaat hawadis se maamoor hai lekin tum yeh khwahish ek aise daur mein kar rahe ho jisme andhe raqs ki tareef karte hain, behre musiqi ki daad de rahe hain, gonge aivan-e-khitabat mein apni guftaar ka ras ghool rahe hain, bune qad aawaron ka qad naap rahe hain, shakhsi tashheer ko zariya-e-azmat samjha ja raha hai, sanat-e-qad awari ka mosam hai, log sifakon se aine-e-wafa aur nafs gumraah se manzil ka pata poochh rahe hain. Sab kuch tumhare samne hai. Khuda khair kare iss waba ne kaise kaise manzar dikhlaye hain. Masjid namaziyon se khali, mimbar par na wa'az, na aalim, na khateeb, na muhtasib. Mehrab mein khamoshi. Khuda unko jazaye khair de jinho ne apna dast-e-pur ata yun daraaz kiya ke na daamon ko khabar hui na aasteenon ko. Khuda unko bhi aamaal ki jaza de jinho ne gharibon ko yun ruswa kiya ke jo bhook se na mara ho so sharm se mar jaye. Duniya mein sirf do hi maashi tabqat hain: ya gareeb hai ya ameer. Matwazan tabqay ki istilah to hum ne apni safed hoshi ke bharam ke liye tarash rakhi hai. Aalam panah to aalam panah hain, unhein to bas farman jaari karna hai, unhein na is se gharz hai ke "muflisi paas-e-sharafat nahi rahne deti", yeh hawa, peir salamat nahi rahne deti. Peit mein bhook se bal parne lagin to kaisi dhoop aur kaisa sooraj? Sab se barh kar peit ki aag! Woh to yeh bhi na jaane hain ke raah-nawardi-e-shauq ne kuye yaar tak ki musafat tay karne tak paon ke chhalon mein kuch na kuch rang-e-henna ka bhi ehtemam kar rakha hai. Mahamari ka to hisaab hai lekin bhook mari ka shumar nahi. Ghurbat naseebon ka to madaawa hua, safed poshi ne to dast talab bhi na daraaz karne diya. Sab kuch khatam ho gaya. Faaqe ka doosra din bhi tamaam hone ke qareeb hua. Bachon ko bilkne ki bhi taab na rahi to biwi ne shohar ki taraf dekha. Dono ek doosre ko dekh kar khamosh ho gaye, safed poshi dast talab daraaz karne mein mani thi. Woh uthi, burqa pehna, shohar aur bachon ko ek nazar dekha aur nikal pari. Jahan anaj taqseem ho raha tha qatar mein ja khadi hui. Haath paon mein larzish bhi thi aur honton par dua bhi. Parwardigar to gharibon ka mohafiz hai, meri laaj rakh lejyo. Usne laaj rakh li. Yeh manzar tum ne bhi dekha hoga. Yeh manzar bhi dekho. Koi sattar baras pehle jab inzimaam-e-Hyderabad hua, jin dhyodhiyon par nobat naqare the, wahan sannaton ka raaj tha. Lakh ke ghar khak hue. Jo kuch bik sakta tha, bik chuka. Jin haathon ne hazaaron ko khairat di thi, un se koi haath milane tak ka rawadaar na tha. Jo zabaan nematon ke zaiqay se aashna thi woh faaqon ke zaiqay se aashna hui aur aise hui ke teesre din paani bhi peet ki aag ke aage haar gaya. Maan baap dono faaqon se be sadh the. Beti ne pehli baar ghar ke bahar qadam rakha. Raat der gaye laut kar aayi. Chulha jala, jab rotiyan samne aayin to kisi ne kuch kaha nahi, bas ro pare. Masajid khali hain, mimbar khamoshi hai, mehrab soona hai, dar mekhana khula hai, saqi saraahi badoosh hai, maikhwar jaam bakaf hain, sheher naghma sara hai. Gareeb ke lab pe manajat hai. Main kya eid karun? Aalam panah to aalam panah hain. Jab tak magarmach ke haath mein tauheez hai darya ki teh mein dhanche to nazar aayenge hi. Tamam raat wahi hai fazaa mein gireh mir Kise khabar pas-e-deewar kiya guzri? Parwardigar tumhari ibadaton ko qabool kare, tumhari sa'ee mashkoor ho, siwaye apne kisi aur ka mohtaj na kare, sarkar-e-doualam ki shafa'at tumhara muqaddar ho. Wassalam! Hamesha tumhara apna Aijaz Farakh Afiyanah