Benazir Bhutto 1988 mein wazir-e-azam bane to People's Party aur Bhutto khandan ke khilaf propaganda ka jawab dene ke liye People's Media Cell banaya gaya. Sheikh Rafiq Ahmed, Jahangir Badar aur Salman Taseer ki tajwez par Hassan Nisar ko People's Media Cell ka sarbrah banaya gaya. Cell ke akhrajat ka mahana takhmeenah 18 lakh rupey tha. Bibi ne faisla kiya ke yeh akhrajat kisi hakoomati wazart ke funds ya wazir-e-azam ke khasoosi funds se nahi People's Party ke apne wusail se pure kiye jayenge. Yun 20 mah tak Mohtarma Benazir Bhutto ki hidayat par party fund se Salman Taseer har mah Hassan Nisar ko 18 lakh rupey faraham karte rahe. People's Media Cell ke ma'awineen mein un sahafiyo ko shamil kiya gaya jo Zia regime aur rajat pasand tolle ke muqablay mein awam dost sahafi ki shanakht rakhte thay. Hassan Nisar 1988 se 1990 ke darmiyan mahnama Zanjeer Lahore ke editor rahe. August 1990 mein People's Party ki hukoomat ke khatmay par Mohtarma Benazir Bhutto Lahore aayin. Senator Gulzar Khan ke ghar par unki sahafiyon se mulaqat ka intizam kiya gaya. Mamoole ki press briefing khatam hone ke baad khane ki mez par Mohtarma Benazir Bhutto ne Manoo Bhai aur mujhe mukhatib karte hue kaha "Humne Hassan Nisar ki sarbrahi mein jo Media Cell banaya tha un bhaiyon aur saathiyo ki khidmat bhi ki lekin aap logon ne People's Party ki mukhalif quwatun ke behuda ilzamat ka is tarah jawab nahi diya jo People's Media Cell ke arkaan ka farz banta tha". Mohtarma ki is baat par humne ek dosre ki taraf dekha aur phir main ne pehle karte hue kaha "Bibi, pehla to hum ne kisi se pichle bees mah ke doran koi paisa nahi liya. Jo bhi shaks aisi adaiygii ka dawa daar hai usay samne betha kar baat ki jaye. Dusra, yeh ke hum karkun sahafi hain Ziaul Haq regime aur rajat pasand siyasi quwaton ke muqablay mein taraqqi pasand awam dost People's Party ki himayat karte rahe aur karen ge. Is moqa par main ne unhein yaad dilaya ke April 1989 mein jab unhon ne MRD ki jamaaton ke kuch karkunon aur Zia Martial Law mein qaid o bandi ki sahoolatein bardasht karne wale sahafiyon ko Islamabad bulaya aur unki madad ki tab bhi main ne aap ki khidmat mein arz kiya tha ke People's Party aur MRD ki Martial Law mukhalif jaddojehad ki apni basat ke mutabiq himayat kisi munafat ke liye nahi jamhooriyat ki bahaali ke liye ki thi is liye aap is waqt jo madad karna chahti hain main khud ko us ka haqdar nahi samajhta". Mohtarma Benazir Bhutto ne is waqt mojood afraad ke samne meri baat ki taeed ki aur unhone Manoo Bhai ki baat se ittefaq karte hue Jahangir Badar se kaha Hassan Nisar ko bulao lagbhag ek ghanta baad Hassan Nisar Senator Gulzar Khan ki aqamat gah par pohanchay aur jaise hi woh drawing room mein dakhil hue hum sab ko wahan dekh kar hairan hue. Us ke aate hi Mohtarma ne apne beg se do kaghaz nikaal kar mez par rakhe ek par People's Media Cell ke ma'awineen ke naam likhe the doosre par bees mah ki mahana adaiygi ki tafseel. Phir unhone Hassan Nisar ko mukhatib karte hue kaha "Aap hamein yeh fehrist diye the ke yeh saathi People's Media Cell mein madad kar rahe hain aur unhein mahana bunyadi par yeh iazaziya diya ja raha hai. Lekin Manoo Bhai aur Hyder Syed to tardid kar rahe hain kisi qisam ki koi raqam People's Media Cell se lene ki doosre log bhi tardid kar rahe hain aap ne paisa liya to kahan gaya agar un doston ko nahi diya gaya?" Mohtarma ne Jahangir Badar aur Sheikh Rafiq Ahmed se shikwa kiya ke aap logon ne kis aadmi ko People's Media Cell ka incharge banaya aur yeh sab kya hai? Hassan Nisar se hum ne kaha ke aap ne kyun is fehrist mein hamara naam likha kyun badnaam kiya behar tar ek badmizgi ke sath woh nishist ikhtitam ko pohanchi Mohtarma Benazir Bhutto jo keh sakti thay unhone un teenon afraad se kaha aur is baat ki maazrat ki ke chunke unhein ghalat maloomat di gayi thi is liye woh shikwa kar baithin. Ab suniye Hassan Nisar ne People's Media Cell wali raqam se apna risala (Zanjeer se woh alag ho chuke thay un ki jagah Baba MaqbuL Ahmed marhoom ne mujhe zanjeer ka editor muqarrar kiya tha) hafta rozah wada nikala kuch property khareedi aur Lahore mein Iqbal Town, Faisal Town aur Model Town C block mein "De Ringlers" ke naam teen aali shaan beauty salon banaye jo saal bhar baad farokht kardiye gaye. Yeh bhi arz kar doon ke Bailey Pur wali arazi Hasan Nisar ko koriyon ke daam mein Mian Shahbaz Sharif ne dilwayi thi. Yeh qissa qabal azeez mukhtasiran aur tafseel ke saath apne column mein tehreer karchuka hoon. Is waqt ise tehreer karne ki wajah badeer Aziz Muhammad Aamir Husaini aur mohatarim Rana Sharafat Ali ka hukm hai jise nazar andaz karna mere liye mumkin nahi. Har dohabab ke hukm aur record ki durustgi ke liye tehreer likh di hai taake sand rehne. Note: Tees saal baad mumkin hai ke tehreer likhte waqt alfaaz aage peechay hogaye hon lekin hua yahi sab kuch jo tehreer kiya hai. Hyder Jawed Sayed