Jis tarah ek server (Server) ke zariye mukhtalif computerz faslon ke bawajood ek dosray ke sath jur jate hain. Isi tarah hamare azhaan ek dosray se magnetic waves ke zariye baham jude hue hain. Hum dekhte hain ke mobile phones alag hone ke bawajood ek dosray se rabta rakhte hain, isi tarah insani dimagh bhi barah e raast baghair kisi zahir waseet ke dosray dimagh ko nah sirf paighaam bhej sakta hai balke is par asar andaaz bhi hota hai. Faslay aur na waqfiyat bhi is amal mein haail nahi hoti, balke matlooba fard chahe kahin bhi ho, aap use jaante hain ya bilkul bhi maaloom nah ho, aap ka mind paighaam ki transmission ke liye khud use talash karke aap ke khayaalat muntaqil kardeta hai. Dosron ke zehan mein apne khayaalat aur ahsasat andilnay ka kaam shuuri tor par bhi hota hai aur la shuuri tor par bhi. Shuuri tor par paigham ya ahsasat ki transmission ko hi telepathy kehte hain. Hamare zehan mein Allah ne bohat taqat rakhi hai. Jab hum sochte hain to nah sirf hamare zehan mein kimiyaai tabdeeliyan waqea hoti hain balke is ki magnetic field mein shiddat ho to doosra fard bhi is se mutasir hosakta hai. Is ki tasir har ek insaan ki apni zehni quwwat par mabni hoti hai. Baaz logon ka khawab sach hojata hai, baaz logon ki nazar bad bohat tez hoti hai aur bohat se log jab kisi ka khayal karte hain to foran us makhsoos fard ki janib se call ya message mosool hojata hai. Mumkin hai yeh ittefaq ho lekin bohat si surton mein darhaqiqat hota yeh hai ke aap ka zehan ghair muree shua (electromagnetic field) ke zariye us fard ko aap ka khayal pohancha deta hai aur woh fard aap se rabta karleta hai. Yeh wazeh rahe ke electromagnetic wave ke zariye hamare dimagh ko din bhar dosron ke jo khayaalat mosool hote hain, hum un musbat ya manfi khayaalat ko manne par majboor nahin. Balke un khayaalat ki asar andaazi ka inhisar hamare zehan ki halat par hai. Isay hum ek behtar misaal se samajh sakte hain. Mukhtalif TV channels ke signals har waqt fazaa mein mojood hote hain lekin unhe catch karne ke liye TV ka hona, us ka on hona aur makhsoos frequency par hona zaroori shra'ait hain. Isi tarah kisi bhi cheez ke bare mein jab hum shiddat se sochte hain to hum apne khayaalat danista ya nadanista paida karke usay nashar karte hain. Ab samne wala is ka asar kis tarah leta hai yeh us ki dimaghi quwat, frequency ka match karna aur us khayal se mutasir hona hai. Jaisa ke shayateen hamare dimagh mein waswasa dalte hain lekin sab par us ka yaksaan asar nahin hota. Kisi shakhs ki dimaghi halat itni kamzor hoti hai ke woh kisi waswe ya shaitani khayal ke aate hi us par amal karna shuru hojata hai aur bohat se log aise bhi hain jo aise khayalat ko foran jhatk kar Allah ki panah mang lete hain. Aap kahin kisi job ke liye apply karte hain, aap poori tarah ahil bhi hain lekin is ke bawajood manfi khayalat bohat hi moaser andaz mein aap par haawi hain ke aap ko job nahi milegi. Ab hota yeh hai ke aap un manfi soch ke zariye ek paigham mutalliq fard ko bhej dete hain jo aap ke intikhab ka zimmedar ho; aur johi aap ki file us ke samne aati hai woh neuron active hojata hai jo darhaqiqat aap ne hi apne manfi khayaalat se usay bheja hota hai ke ‘‘aap ko job nahi milegi.’’ Chananche agar woh is khayal ko nahin jhatk deta to kisi jawaaz ko tarash kar woh shakhs aap ko reject kardeta hai. Aap ke nazdeek woh shakhs hi aap ke mustard hone ki wajah hai lekin haqeeqatan yeh paigham aap ne hi usay bheja hota hai ke aap ko reject kiya jaye aur us shakhs ke sath aap bhi apne mustard hone ke zimmedar hain. Bazahir yeh batein badi talasmati mehsoos hoti hain lekin physics mein higgs field ke nazariye ke baad yeh mafhoom science ki roshni mein bhi qubool kar liya gaya hai. Mashhoor neuro scientist carl sagan ne is bare mein ECG aur MRI ke zariye tajrubi shawahid se yeh baat sabit ki hai ke kis tarah baghair kisi zahir waseet ke, ek fard ke khayal ne doosre fard ke dimagh mein kimiyaai tabdeeliyan paida ki hain. Lihaza aaj yeh baat sciencei tor par sabit shuda hai ke hamari manfi soch hal.Is mein tabdeeli peda kar sakti hai. Musbat soch rakhne ki naseehat mahaz aik naseehat ya "qaul-e-zarreen" nahi balkay kainat ke afaqi asoolon ki roshni mein bhi intehai lazim hai. Apne taur par behtareen planning ke baad hamare sath jo kuch bura hota hai, karobar mein nuqsaan, bimari, imtehan mein nakami, nagahani hadsat wagaira, in mein se bohot se masail fi alwaqai qismat, halat aur khariji aamal ke sabab se peda hote hain lekin aksar masail darhaqeeqat hamari apni hi manfi soch ki wajah se hote hain. Hum apne hi telepathic peghamat se logon ke rawaye aur halat banate hain aur phir apni qismat par rote hain halanke is ke zimmedar hum khud hote hain. Lihaza hamein chahiye ke hum hamesha musbat sochne ki koshish karein, bila wajah halat se badguman na hon. Bible ki kitab-e-amthal mein aik bohot khubsurat firqah hai ke "shadman dil shafa bakhshata hai lekin afsurda dili haddiyon ko khushk kar deti hai." (Amthal 17:22) Hamare deen ne bhi hamein yeh taleem di hai ke hum hikmat amli ke baad Allah par mukammal bharosa rakhein, dua karein aur manfi khayalat se gariz karein wagarahna Allah ka qanoon yahi hai ke bandah jaisa guman karta hai, waisa hi mamla us ke sath hota hai.