Kisi sochay samjhay life time project ke tehut kaam kar raha ho. Ghazali ne jis mahol mein aankh kholi wahan har kalmi group masla tawil ke peesh nazar ek doosray ki takfir par dilair tha. Is mahol mein lazim tha ke ummat ko jama karnay ke liye nazariyati frame work tayar kiya jaye. Is ke peesh nazar unhone "Fasal al-Tafriqa Bain al-Islam wal-Zindiqah" likhi jis mein woh yeh batate hain ke kufr aur Islam ke mabain khat imtiaz khinchne ka asool kya hai. Is kitab mein woh aisa nazariyati frame work dene ki koshish karte hain ke zyada se zyada kalmi groupon ko takfir se bachaya ja sake. Asool takfir par kaam karne walay ashab-e-ilm ke liye un ki yeh kitab aaj bhi ahem hai. Ghazali ka kamal yeh tha ke woh maslay ko jur se pakarne ki kamal salahiyat rakhte the. Mukhtalif groupon ke mabain tawil ke bab mein jhagray ki bunyad un sab ka "tasawur namumkin" tha jis ki bunyad "ilm zaroori" ka tasawur tha. Ilm zaroori kya hai aur kya nahi nez isay maloom karne ke asool kya hain, is ke liye "Qistas al-Mustaqim" tehreer ki (naam se logic par bhi ek kitab likhi). Lekin sirf kufr aur Islam ke mabain khat imtiaz qaem kardena hi kafi nahi tha, daira Islam ke andar aqaid ke bab mein munasib aur mutadil rawiya kya hai is ke liye "Al-Iqtisad fi al-Aitiqad" tehreer ki jis mein mukhtalif fehmi bahsoun mein durust aqaid se mutalliq asoolon ki nishandahi ki (Imam Ghazali ke asool tawil ko samajhne ke liye in teen kitabon ka mutalia zaroori hai). Muslman dunya mein falsafah ki taleematain ke natijay mein ilm ki secularization ke jis project ka aghaz hona chahta tha us ka zor tornay ke liye "Tahafut al-Falasifah" tehreer ki. Yeh kitab falsafah ki taleematain ke bajaye Nabi Alaih Salam ki taleematain ki taraf rujoo deti hai. Albatah "Tahafut al-Falasifah" sirf ek anhadami karwai thi, kis cheez ko tameer karna hai aur kaise, is ke liye "Ihya al-Ulum al-Din" likhi. Yeh kitab char jildon par mushtamil hai. Aadhi se bhi kam jild aqaiday ki bahs se mutalliq, dairh jildain amli fiqhi masail ke baray mein aur do jildain tehzeeb akhlaq (ehsaan ya amli tasawwuf) par mushtamil hain. Yeh un ke tasawur deen ka izhar tha ke musalman muashray ko kis cheez par kitni mehnat karne aur tawajju dene ki zaroorat hai. Ihya al-Ulum mein 'Kitab al-Ilm' ke andar imam Ghazali ilm ki jo darja bandi karte hain woh bezaat khud khasay ki cheez hai aur jis ki roshni mein musalman muashray aaj bhi apni taleemi policies ke khatoot waza kar sakte hain. Kalmi bahsoun ke tareeqay se kya hasil kiya ja sakta hai aur kya nahi, is ki hudood wazeh karne ke liye ilm al-kalam par kitab likhi taake koi shakhs is ke baray mein zaroorat se zyada khushfahmi ka shikar na hojaye. Kalam ke bajaye Ghazali islah nafs ki ahmiyat ko aghar karte hain aur is ke liye bohot si kitabain tehreer ki. Usool fiqh ke mamlay mein un ki kitab "Al-Mustasfi" ka maqam kya hai, yeh kisi Shafi'i aalim se pooch kar dekhein. Shafi'i ke ilawah is ilm ke tamam mahireen ke yahan Ghazali ki is kitab ko usool fiqh ki chand ahem tareen ibtidaei kitabon mein se ek shumar kiya jata hai. Is kitab mein usool fiqh ko mantiqi istidlalat ki saakht par likha gaya hai jo is tarz par likhi gayi usool fiqh ki pehli kitab thi. Ahkamat deen ko maqasid o masalih deen ke sath kaise jora jana chahiye, is ka frame work tayar karne ke liye "Shifa al-Ghalil" tehreer ki. Ahl-e-fun ka kehna hai ke maqasid shariah ke zimn mein joini aur Ghazali ke is kaam ne Shafi'i fiqh ko nai uthan aur wusat bakhash di jo is se pehle Shafi'i fiqh mein mojood nahi thi. Maze ki baat yeh hai ke is shakhs ne sirf 53 qamri saal ki umr pai jis mein hasool-e-haq ke liye sahranawadi ke mah o sal bhi shamil hain, woh bhi duniya ke tamam lazzat maseer aachuknay ke baad. "Al-Munqidh min al-Dalal" mein is shakhs ki himmat o justuju dekh kar banda hairanhojata hai. aur aisa thori hai ke Allah ne us ki mohabbat musalmano ke dil mein na dali ho: ahle-sunnat ki har fiqh wa maslak wala pukaar utha: haan woh 'Hujjatul Islam' tha.