chand lamhaat ke liye meri darkhwast par us dor mein time travel kijye ke jab hazrat Muhammad (S.A.W) ke wasaal ko sirf 80 saal guzre the. Ek bhi sahabi zinda nahi hai albata woh log mojood hain jinhone sahaba ko dekha tha. Is waqt na Abu Hanifa paida hue the na Imam Malik na Imam Jafar Sadiq aur na Fiqh likhne wala koi aur imam paida hua tha. Aap ek aise dor mein pahunch gaye hain ke hadees ki ek bhi kitab mojood nahi hai. Aur Imam Bukhari aur Muslim samait digar muhadiseen paida hone mein abhi sau, so sau saal se zyada arsa hai. Yeh to badi mushkil surat-e-haal hai ab aap ko sunnat kaise pata chalegi? Farz kaise pata chalenge? Log aakhir kaise musalman hain ke hamare imamon mein se koi paida hi nahi hua jin ke kiye hue kaam ke baad hum aaj Shia aur Sunni, Hanbali aur Shafi'i waghera bane. Deoband aur Barelvi madarsa to abhi sau hazaar saal baad bane ga, lehaza aap Deobandi Barelvi bhi nahi ban sakte, Wahabi bhi nahi ho sakte kyunke Wahabi firqe ki shuruaat mein abhi sau hazaar saal ka arsa hai, Ahl-e-Hadees to tab bane jab hadees ki koi kitab ho. Jis dor mein aap pahunch gaye hain us waqt log hadees nabvi ko likhne ka tasawwur bhi nahi karte the kyunke Hazrat Muhammad (S.A.W) ne saaf saaf kaha tha ke agar kisi ne mujh se sun kar Quran ke ilawa kuch likh liya hai to woh mita de. Aur logon ko apne buzurgon se suni hui yeh baatein yaad hi hain ke Hazrat Abu Bakr Siddiq aur Hazrat Umar ne apne apne adwaar mein logon ki apne Nabi (S.A.W) ki muhabbat mein likhi jane wali ahadith ko ikattha kar ke aag laga di thi. Unhein jaleel-ul-qadr sahaba ki yeh naseehat yaad hai ke Nabi (S.A.W) ne Quran aur apni sunnat ke ilawa kuch nahi chhoda lehaza aap Ahl-e-Hadees to ho hi nahi sakte. Sahaba mein se koi zinda nahi. Badi mushkil mein hain hum ab kahan jayen. Itne mein masjid mein azaan ki awaz aati hai, aap masjid pahunchte hain to kaise namaz padhein ge, haath bandh kar ya haath chhod kar? Aap yaqeenan waise hi namaz padhein ge jaise wahan ki masjid mein log padh rahe honge. Yani sunnat musalmanon mein raij hai. Farz ka pata waise hi Quran se chal raha hai aur Quran to tab bhi wahi tha jo aaj hai. Yani us dor ke musalman Quran aur muashray mein raij sunnat ke sahare hum se kahin behtar musalman the. Ahadith Quran ke nazool ke sath sath us ki tashreeh ko sunnat ki shakal mein ibtidaai islami muashray mein raij karne ke liye thin aur har sunnat Quran ki takmeel ke sath hi islami muashray mein raij ho chuki thi. Quran ki takmeel ke sath hi sunnat ki bhi takmeel ho chuki thi. Yani ahadith apni zaroorat poori kar chuki thin. Tabhi Abu Bakr aur Umar ne ahadith ke zakhiron ko aag lagai taake Quran aur sunnat hi ane wali naslon ke liye islam ka maakhaz ho. Tabhi aakhri hajj ke mauqe par Hazrat Muhammad (S.A.W) ne deen ki takmeel ka elaan karte hi sahaba se kaha ke jo yahan mojood nahi un tak deen pohanchaien jise ek aayat bhi samajh aayi ho wahi baqioun ko pohanchaye. Isi liye sahaba wahan se nikle aur adhi se zyada dunya mein phail gaye. Jin sahaba ne Nabi (S.A.W) ko haath bandh kar namaz padhte dekha tha waise hi logon ko sikhaya jinhone haath chhod kar ya raf'a yadayn karte dekha tha unhone aage waise hi sikhaya. Kufe ki taraf jo sahaba gaye woh Aap (S.A.W) ko haath bandh kar namaz padhte dekhte rahe the lehaza Iraq ke sab musalmanon ki agli naslein usi sunnat par amal karne lagi. Africa aur kuch aur ilaqon mein jo sahaba pahunchay unhone haath chhod kar namaz padhne ki sunnat sikhayi lehaza aaj tak Africa ke karodon musalman haath chhod kar namaz padhte aur aeen sunnat nabvi par amal karte hain. Raf'a yadayn karna bhi sunnat hai na karna bhi aeen sunnat. Namaz to ek misaal hai. Har mulk ke musalmanon ne mukhtalif muamalat aur ibadat mein alag alag sahaba se alag alag sunnat sikhayi lehaza sabhi thoray thoray mukhtalif hone ke bawajood sunnat par hi amal karte hain. Allah ne sahaba ke zariye har woh tareeqa ibadat kisi na kisi mulk mein raij karwa diya jo Nabi (S.A.W) ne kabhi na kabhi ikhtiyar kiya tha. US waqt ke musalman jab Haj ke liye mukhtalif mulkon se ikathey hote to in ikhtilafat ko bhi mohabbat ki nazar se dekhte thay. Iraq walay kehtay ke haath bandh kar namaz ka tareeqa zyada modabana hai, Madina walon ki daleel hoti ke Hazoori ka ehsaas haath chhod kar namaz parhne se zyada aata hai. Yeh ilmi muzakray chalte rehte lekin koi is ikhtilaf ki bunyad par ek doosre ko ghalat nah kehta. Ab apni ankhain dobara kholen. Hum is waqt 120 Hijri, yaani Hazrat Muhammad (SAWW) ke wisaal ke 110 saal baad ke Madina mein mojood hain. Madina sheher mein Imam Malik mojood hain aur Madine mein hi Imam Jafar Sadiq bhi hain. Yeh dono imam apni apni fiqh tarteeb de rahe hain takay musalmanon ki barhti hui tadad ke liye naye paida hone wale masail mein rehnumai hosakti. Unka yeh maqsad kabhi nahi ke yeh ummat ko farqon mein baantein. Yeh ek doosre ki be pana izat karte hain. Aeen is waqt Iraq ke sheher Kufa mein Imam Abu Hanifa bhi fiqh likh rahe hain, internet aur telephone ka daur to hai nahi aur na hi akhbarat ya risalay chhaptay hain. Ek mulk se doosre mulk ke safar ke liye mahinon lag sakte hain, is liye mukhtalif imam apne apne logon ki aasani ke liye mukhtalif mulkon mein fiqh likh rahe hain. Imam Shafi'i ab se kuch saal baad Ghazah Filasteen mein apni fiqh likhenge aur Imam Ahmad bin Hanbal Baghdad mein yehi kaam karenge. Aap ko yeh haal sun kar shaq lag sakta hai ke baqi sab imam door draz mulkon mein hain. Aur Nabi ke sheher mein paida hote aur Masjid-e-Nabwi mein apni zindagi ki sab namazain parhne wale imam do hi hain yaani Malik aur Jafar Sadiq, aur dono hi apni apni fiqh mein haath chhod kar namaz parhne ka tareeqa batate hain. Kya aap tasawwur kar sakte hain ke Hazrat Muhammad (SAWW) ki wafat ke sau saal baad hi Masjid-e-Nabwi mein namaz ka tareeqa badal gaya tha jo in dono imamon ne haath chhod kar namaz parhne ko Islami tareeqa bataya. Neh sirf yeh balkay talaq ke liye bhi yeh alag alag mawaqe pardee gayi talaq ko hi sahi samajhte hain in dono ke nazdeek ek mawaqe par bees dafa di gayi talaq bhi ek hi shumar hogi. Aise hi Madina ke yeh dono imam aksar muamlaat mein aqli daleelain dete hain ke aqal ke istemal ka hukam quran mein sat sau chhappan bar hai aur Madine mein abhi Muhammad (SAWW) ke qaim kardah asarat baqi thay. Aise mein aap dekhte hain ke Islam ka ek azeem talib ilm Kufa se ilm-e-deen seekhne Madina aata hai, ji haan yeh Nauman bin Thabit hai jise aap Abu Hanifa kehte hain, yeh Imam Jafar Sadiq ki shagirdi ikhtiyar karta hai aur jald hi uski shohrat poore Makkah Madine mein phail jati hai. Imam Malik jab bhi usay milte hain ehteram uth kar khade hojate hain. Yeh Imam bhi apni fiqh likh rahe hain aur haath bandh kar namaz parhne aur rafay yadayn na karne ka tareeqa bayan karta hai jis par na Imam Malik aitraz karte hain aur na Imam Jafar Sadiq balkay Imam Malik ab bhi jaise hi Imam Abu Hanifa ko dekhte hain ehteram uth kar khade hojate hain. Un ke shagird poochte hain aap to kisi ke liye bhi khade nahi hote phir unke liye kyun khade hote hain to Imam Malik kehte hain Islam ke aise alim aur aashiq-e-rasool ka ehteram mujh par wajib hai. Wazeh rahe ke Imam Malik ne ek Haj ke ilawa kabhi Madine se bahar ka safar nahi kiya ke kahin Muhammad (SAWW) ke sheher se bahar maut na aajaye. Har namaz Masjid-e-Nabwi mein ada ki kabhi jootay nahi pehnay ke mein kahin aisi jagah joota na rakh doon jahan Muhammad (SAWW) nange paon guzre hon. Kabhi sawari par na baithe ke kahin mein kisi aisi jagah sawar ho kar na guzar jaoon jahan se Muhammad (SAWW) paidal guzre hon. Lekin wahi Imam Malik jo rafay yadayn aur haath chhod kar namaz parhne ka tareeqa batate hain ek aise alim ka ehteram karte hain jo rafay yadayn na karne aur haath band kar namaz ka tareeqa batata hai aur woh Abu Hanifa Imam Jafar ki shagirdi ikhtiyar kiye hue hain jo haath chhod kar namaz padhte hain aur jinhe ab Shia Imam samjha jata hai. Ghazah se ek aur Imam yaani Imam Shafi'i Madina aate hain woh khud haath bandh kar namaz parhne ka tareeqa apni fiqh mein likh chuke hain aur barmala yeh bhi kehte hain ke ru-e-zameen par imam kiAm Malik se bara hadith aur fiqh ka koi alim mojood nahi. Mujhe yakeen hai ke yeh dekh kar aap par hairat ke pahar tut parayenge ke aapke dor mein to Rafayadain, haath chhod kar ya haath bandh kar namaz parhna aur aisi hi dosri baaton par beiswah firqay ek doosre ko kafir kehte hain aur yeh Aaima karam ek doosre ka itna ehtram karte hain ke agar koi imam kisi doosre imam ke ilaqe mein jaye to doosri fiqh ke log unhein jamaat karwane ko kehain to woh apne tareeqe se nahi, usi imam ke tareeqe se namaz padhata hai jis imam ki woh masjid mein hai. Yeh dekhte hi aapko pata chal jayega ke shirpsand aapko musalman se hewan bana rahe the. Bhaaiyon ko Shia, Sunni, Deobandi, Barelvi, Wahabi waghera bana kar larwate the. Aapko apne dor ke maulvi se nafrat aur un Aaima se muhabbat mehsoos hogi aur aap mukhtalif tareeqon se namaz, roza aur doosri ibadat karne wale logon ko ikhtilaf ke bawajood muhabbat ki nazar se dekh kar apne jaisa musalman samjhein ge. Agar mein aap se kahoon ke firqon mein bat jana shirk hai to shayad aapko yakeen na aaye ke aapko kabhi un ayat ke bare mein to nahi bataya gaya hoga jin mein Allah kehta hai ke ''Isi ki taraf rujoo karte raho aur is ka taqwa ikhtiyar karo aur namaz qaim karo aur mushrikon mein se mat hojao, un mushrikon mein se jinhone apne deen ko firqon mein baant diya aur giroh dar giroh hogaye. Har giroh isi par magan hai jo us ke paas hai". Kya is ayat ke is khule hukm ke baad bhi aap Deobandi, Barelvi, Shia, Hanafi, Shafi'i ya Maliki kehlwana pasand karen ge? Aap sab chahte hain ke qayamat ke din Hazrat Muhammad ﷺ aapki shafa'at karen lekin mein aapko bataata chalon ke Allah surah An'am ki ayat 150 mein apne Nabi ko kya hukm de rahe hain. ''Be shak jin logon ne apne deen ko firqon mein taqseem kiya aapﷺ ka kisi cheez mein us se koi taluq nahi''. Kya yeh ayat jaan kar bhi aap Shia, Sunni, Deobandi, Barelvi waghera banna pasand karen ge ya musalman hona chahen ge? Jab Islam aaya to log qabailon mein bate hue the aapas mein nafratein thi lekin Allah ki rassi yani Quran ne unhein bhai bana diya, Sunnat-e-Nabvi ne unke dil jod diye lekin musalman phir se firqon mein bat kar ek doosre ke dushman aur jahannam se qareeb tar hogaye. Allah surah Aal-e-Imran mein farmate hain ''Allah ki rassi ko mazbooti se thaam lo aur firqon mein na bat jana''. Kya aap ab bhi Wahabi, Ahl-e-Hadith ya Ahl-e-Quran jaise kisi firqe se mansoob hona pasand karen ge ya musalman hona chahenge? Kyunki na hum Sahaba ke dor ke musalman ban jaayein jo Quran ko Islami ilm ka bunyadi maqz mante the. Un ke samne jab koi hadith pesh ki jati to woh yeh dekhte ke kahin woh hadith Quran se to nahi takrati, agar aisa hota to woh foran kehte ke Nabiﷺ aisa nahi keh sakte, yeh Quran ke khilaf hai. Rawi se sunne mein ghalti hui hogi. Agar hadith Quran ke khilaf na ho to use sar ankhon par rakhte. Kyunki na hum sab Aaima ko apna lein. Sab ki izzat karein aur jis imam ki bhi fiqh se jo hukm aasaniyan paida kare woh lein lekin khud ko kisi bhi imam se mansoob na karein aur bas baghair kisi firqe ke pehle dor ke musalman ban jaayein. Kyun na hum aqal se kaam lena shuru karein ke Quran aqal ke istemal ka sikon bar hukm deta hai. Mein aapko firqon se nikal kar Muhammadﷺ ke deen aur Sahaba aur tamam Aimmah ke Islam mein ane ki dawat deta hoon. ***