نعت رسول کریمﷺ

مصنف : محمد شفیع الدین نیر

سلسلہ : نعت

شمارہ : اگست 2013

 

اللہ نے اپنی رحمت سے اک چاند عرب میں چمکایا
کیا خوب کرشمہ قدرت کا دنیا والوں کو دکھلایا
 
اس چاند کا نام محمد ہے ، کتنا میٹھا ، کیسا پیارا
اس نام سے دنیا روشن ہے ، اس نام سے جگ ہے اجیارا
 
بندوں کو خدا کی رحمت کا مژدہ وہ سنانے آئے تھے
کس طور سے ہم دنیا میں رہیں ، خود رہ کے بتانے آئے تھے
 
نیکی کا پڑھایا ہم کو سبق ، دکھلائی راہ بھلائی کی
جڑ کاٹی ساری بدیوں کی ڈھا دی دیوار بڑائی کی
 
مسلم سا پیارا نام دیا اور دین ہمیں اسلام دیا
ایمان کی بھی دولت بخشی اللہ کا بھی پیغام دیا
 
فرمایا تم مسلم سارے آپس میں بھائی بھائی ہو
گھل مل کے رہو ، مل جل کے رہو منظور جو اپنی بھلائی ہو
 
فرمایا تم امداد کرو مظلوموں کی ، ناداروں کی
معذوروں کی ، مجبوروں کی ، بیماروں کی ، بے چاروں کی
 
وہ ماہ عرب ہی اے نیر ، اپنا تو جہاں میں سہارا ہے 
ہوجائیں فدا اس نام پہ ہم ، یہ نام ہی ایسا پیارا ہے