اے شہر علم و عالمِ اسرارِ خشک و تر

مصنف : محسن نقوی

سلسلہ : نظم

شمارہ : جولائی 2013

اے شہر علم و عالمِ اسرارِ خشک و تر
تو بادشاہِ دیں ہے۔۔ تو سلطانِ بحر و بر


ادراک و آگہی کی ضمانت ترا کرم۔۔!
ایقان و اعتقاد کا حاصل تری نظر


تیرے حروف نطقِ الٰہی کا معجزہ!
تیری حدیث سچ سے زیادہ ہے معتبر


قرآں تری کتاب، شریعت ترا لباس
تیری زرہ نماز ہے، روزہ تری سپر


یہ کہکشاں ہے تیرے محلے کا راستہ!
تاروں کی روشنی ہے تری خاکِ رہگذر


جبریل تیرے در کے نگہباں کا ہم مزاج
باقی ملائکہ تیری گلیوں کے کوزہ گر


محفوظ جس میں ہو تیرے نقشِ قدم کا عکس
کیوں آسماں کا سر نہ جھکے ایسی خاک پر؟


کیا شئے ہے برق، تابشِ جَستِ براق ہے
معراج کیا ہے۔۔ صرف تیری سرحدِ سفر


موجِ صبا کو ہے تری خوشبو کی جستجو
جیسے کسی کے در کی بھکارن ہو دربدر