حمد رب جلیل

مصنف : محسن نقوی

سلسلہ : حمد

شمارہ : اپریل 2013

 

اے عالمِ نجوم و جواہر کے کِردگار !
اے کارسازِ دہر و خداوندِ بحر و بر
اِدراک و آگہی کے لیے منزلِ مراد
بہرِ مسافرانِ جنوں ، حاصلِ سفر !
یہ برگ و بار و شاخ و شجر ، تیری آیتیں
تیری نشانیاں ہیں یہ گلزار و دشت و در
یہ چاندنی ہے تیرے تبسم کا آئینہ
پرتَو ترے جلال کا بے سایہ دوپہر !
موجیں سمندروں کی ، تری رہگزر کے موڑ
صحرا کے پیچ و خم ، ترا شیرازہ ہْنر !
اْجڑے دلوں میں تیری خموشی کے زاویے
تابندہ تیرے حرف ، سرِ لوحِ چشم تر
موجِ صبا ، خرام ترے لطفِ عام کا
تیرے کرم کا نام ، دْعا در دْعا ، اثر
پنہاں ہے کائنات کے ذوقِ نمو میں تْو
تیرے وجود کی ہے گواہی چمن چمن !
ظاہر کہاں کہاں نہ ہْوا ، رنگ و بْو میں تْو
مری صدا میں ہیں تری چاہت کے دائرے
آباد ہے سدا مرے سوزِ گلو میں تْو
اکثر یہ سوچتا ہوں کہ موجِ نفس کے ساتھ
شہ رگ میں گونجتا ہے لہْو ، یا لہْو میں تْو ؟
اے عالمِ نجوم و جواہر کے کِردگار !
مجھ کو بھی گِرہ شام و سحر کھولنا سکھا !
پلکوں پہ میں بھی چاند ستارے سجا سکوں
میزانِ خس میں مجھ کو گہر تولنا سکھا
اب زہر ذائقے ہیں زبانِ حروف کے
اِن ذائقوں میں ‘‘خاک شفا’’ گھولنا سکھا
دل مبتلا ہے کب سے عذابِ سکوت میں
تو ربِّ نطق و لب ہے ، مجھے ‘‘بولنا’’ سکھا