ہے روشنی ہی روشنی سیرت حضور ﷺ کی
قرآن کی سب آیتیں مدحت حضور ﷺ کی
دنیا میں کون اس سے بڑا خوش نصیب ہے
حصے میں جس کے آ گئی الفت حضور ﷺ کی
سب انبیا کی امتیں ہیں معتبر مگر
سب امتوں سے بہتر امت حضور ﷺ کی
دنیا میں یوں تو اور بھی اعزاز ہیں بڑے
سب سے بڑا اعزاز ہے نسبت حضور ﷺ کی
ہر اک کو گماں کہ محبوب تر ہوں میں
بے مثل و بے مثال ہے شفقت حضور ﷺ کی
گھیرا غموں کی دھوپ نے تو معجزہ ہوا
اک ابر بن کے چھا گئی رحمت حضور ﷺ کی
میں کیسے مان لوں کہ وہ ایمان دار ہے
رکھتا نہیں جو دل میں عقیدت حضور ﷺ کی
ساحر کو بھیک دیجیے لکھی ہے جس نے نعت
مشہور ہے جہاں میں سخاوت حضور ﷺ کی
