نعت رسول کریم

مصنف : دلاورعلی آزر

سلسلہ : نعت

شمارہ : جولائی 2019

بنتا ہی نہیں تھا کوئی معیارِ دو عالم
اِس واسطے بھیجے گئے سرکارِ دو عالم
جس پر ترے پیغام کی گرہیں نہیں کھلتیں
اُس پر کہاں کُھل پاتے ہیں اسرارِ دو عالم
آکر یہاں ملتے ہیں چراغ اور ستارہ
لگتا ہے اسی غار میں دربارِ دو عالم
وہ آنکھ بنی زاویہ محورِ تخلیق
وہ زلف ہوئی حلقہ پرکارِ دو عالم
سرکار کی آمد پہ کھلا منظرِ ہستی
آئینہ ہوئے یوں در و دیوارِ دو عالم
یہ خاک اُسی نور سے مل کر ہوئی روشن
یوں شکل بنی شکلِ طرح دارِ دو عالم
آہستہ روی پر تری قربان سبک پا
اے راہبرِ گردشِ سیّارِ دو عالم
توقیر بڑھائی گئی افلاک و زمیں کی
پہنائی گئی آپ کو دستارِ دو عالم
ہر نقش ہے اِس پیکرِ ذی شاں کا مکمل
آزر یہی شہکار ہے شہکارِ دو عالم