حمد

 حمدرب ذوالجلال
کون پانی کو اْڑاتا ہے ہوا کے دوش  پر
کس نے بخشی پیڑ کو آتش پذیری سوچئے
کس کے لطفِ خاص سے نغمہ فشاں ہے سانس کی
دھیمی دھیمی، دھیری دھیری یہ نفیری سوچئے
کس کی شانِ کن فکاں سے پھوٹتا ہے خاک  سے
یہ گیاہِ سبز کا فرشِ حریری سوچئے
کون دیتا ہے جوانی میں لہو کو حدتیں 
کون کر دیتا ہے عاجز وقتِ پیری سوچئے
ہر دلِ بے مہر پر مْہریں لگا دیتا ہے کون
کون کرتا ہے عطا روشن ضمیری سوچئے
وادیِ بطحا میں اک اْمی پیمبر بھیج کر
کس نے کی انسانیت کی دستگیری سوچئے
انور مسعود