کیا شان ہے شانِ خیرِ بشر ، اِنّا اَعْطَیْنک الکَوثَر
رحمت نے پکارا خود بڑھ کر ، اِنّا اَعْطَیْنک الکَوثَر
کب حق نے گوارا فرمایا ، دیکھے وہ ملالِ پیغمبر
جبریل کو بھیجا دے کے خبر ، اِنّا اَعْطَیْنک الکَوثَر
آئی جو صحابہ تک یہ خبر ، کفار سے بولے خوش ہو کر
اب لاؤ کوئی ایسا لکھ کر ، اِنّا اَعْطَیْنک الکَوثَر
یاقوتِ یمن نقطہ نقطہ ، الفاظ ہیں گوہرِ ناسُفتہ
الماس کی قاشیں زیر و زبر ، اِنّا اَعْطَیْنک الکَوثَر
یہ آیت ڈالی پھولوں کی ، یہ نقطے قطرے شبنم کے
اعراب زر و تشدید و ثمر ، اِنّا اَعْطَیْنک الکَوثَر
ہر لفظ مئے عرفاں کی قدح ، ہر حرف کی رنگت قوسِ قزح
ہر حرف کا چہرہ شمس و قمر ، اِنّا اَعْطَیْنک الکَوثَر
جس دل کو تلاشِ تسکیں ہو ، مجروحِ ستم ہو ، غمگیں ہو
لازم ہے پڑھے وہ شام و سحر ، اِنّا اَعْطَیْنک الکَوثَر
