نعتِ رسول کریمﷺ
دل سے جو آپ کا نہیں ہوتا
وہ حقیقت سے آشنا نہیں ہوتا
عشق میں جو فنا نہیں ہوتا
دل وہ پھر کام کا نہیں ہوتا
وہ خدا سے کبھی نہیں ملتا
آپ سے جو ملا نہیں ہوتا
میں کراچی میں ، وہ مدینے میں
یہ کوئی فاصلہ نہیں ہوتا
ہر نبی یوں تو ہے نبی لیکن
ہر نبی مصطفیٰ نہیں ہوتا
اشک ہوتے ہیں ترجماں دل کے
لب پہ جب ماجرا نہیں ہوتا
میرے سرکار کی گلی کا رنگ
میرے دل سے جدا نہیں ہوتا
اشک بہتے ہیں نعت ہوتی ہے
میرے گھر میں بھی کیا نہیں ہوتا
ان سے مسرور کیا چھپاؤ گے
ان سے کچھ بھی چھپا نہیں ہوتا
مسرور کیفی
