حضورؐ جب بھی ثنا کا خراج دیتے ہیں
شعور کا میرے دل کو اناج دیتے ہیں
جو در پہ آئے گدا اس کو شاہ کرتے ہیں
حضورؐ بیش تر از احتیاج دیتے ہیں
غم و الم کا مداوا شہ انامؐ کی ذات
وہ قلب غم زدہ کو ابتہاج دیتے ہیں
جو ان کا طوق غلامی گلے کا ہار کرے
حضورؐ اس کو دو عالم کا راج دیتے ہیں
گدائے شاہ دو عالم ہوں فکر کاہے کی
وہی نوازیں گے کل بھی جو آج دیتے ہیں
ہم انقلاب کے داعی ہیں اس جہاں میں عتیق
محبت شہ دیںؐ کو رواج دیتے ہیں
