کدی تے پیکے جا نی بیگم

مصنف : زاہد فخری

سلسلہ : طنز و مزاح

شمارہ : مئی 2010

 

کدی تے پیکے جا نی بیگم
آوے سُکھ دا ساہ نی بیگم
 
کٹھیاں رہ رہ اَک گئے آں ہن
لاگے بہ بہ تھک گئے آں ہن
 
ٹینڈے وانگوں پک گئے آں ہن
تے پر وی نکو نک گئے آں ہن
 
ہن تے سینے ٹھنڈ پا نی بیگم
کدی تے پیکے جا نی بیگم
 
اِکو چھپڑ دے وچ تر کے
کی لبا اے شادی کر کے
 
جندڑی لنگ چلی مر مر کے
ادھے رہ گئے آں ڈر ڈر کے
 
مل گئی اے بڑی سزا نی بیگم
کدی تے پیکے جا نی بیگم
 
تے کی کی رنگ وخا دتے نی
سجن یار چھڈا دتے نی
 
پِشلے پیار پُلا دتے نی
بینگن تک کھوا دتے نی
 
ترس کوئی ہن کھا نی بیگم
کدی تے پیکے جا نی بیگم
 
تے شام منان نوں دل کردا اے
سغرٹ پان نوں دل کردا اے
 
باروں کھان نوں دل کردا اے
تازے نان نوں دل کردا اے
 
کر دے پُورے چا نی بیگم
کدی تے پیکے جا نی بیگم
 
تے اپنی مرضی آیے جایے
مُنڈیاں ورگے کپڑے پایے
 
راتاں نوں سُکھ رات بنایے
کُج دن اسی وی عید منایے
 
بدلے زرا ہوا نی بیگم
کدی تے پیکے جا نی بیگم