میڈا عشق وی توں میڈا یار وی توں میڈا دین وی توں ایمان وی توں
میڈا جسم وی توں میڈا روح وی توں میڈا قلب وی توں جند جان وی توں
میڈا کعبہ قبلہ’ مسجد’ منبر مصحف تے قرآن وی توں
میڈے فرض فریضے حج زکاتاں صوم صلوٰت اذان وی توں
میڈا زہد عبادت طاقت تقویٰ علم وی توں عرفان وی توں
میڈا ذکر وی توں میڈا فکر وی توں میڈا ذوق وی توں وجدان وی توں
میڈا سانول مٹھڑا شام سلونا من موہن جانان وی توں
میڈا دھرم وی توں میڈا بھرم وی توں میڈا شرم وی تو میڈا شان وی توں
میڈا دکھ سکھ روون کھلن وی توں میڈادرد وی توں درمان وی توں
میڈا خوشیاں دا اسباب وی توں میڈے سولاں دا سامان وی توں
میڈا حسن تے بھاگ سہاگ وی توں میڈا بخت تے نام و نشان وی توں
میڈی مہندی کجل مساگ وی توں میڈی سرخی ’ بیڑا ’ پان وی توں
میڈی وحشت جوش جنون وی توں میڈا گریہ آہ و فغان وی توں
میڈا شعر عروض قوافی توں میڈا بحر وی توں اوزان وی توں
میڈا اول آخر ’ اندر باہر ظاہر تے نپہان وی توں
جے یار فرید قبول کرے سرکار وی توں سلطان وی توں
نہ تاں کہتر کمتر احقر ادنیٰ لا، شے لا امکان وی توں
